يوميات ام كتكووتو في النادي

سلام عليكم حبايبي الحلوين



اشلونكم شخباركم



اليوم سجلت في النادي الرياضي للسيدات


دفعت 10 دينار وعطوني لوكر حق اغراضي وراوني النادي والاجهزه والايروبك

وحمام السباحه الكبير اللي يطير الدماغ

طبعا انا اخترت الاجهزه كبدايه

والايروبك العبه في البيت




حطيت اغراضي وكنت لابسة لبس الرياضه مالي لكن




ما كنت لابسه جووتي رياضه (على بالي مافي داعي منه)


قالت لي المدربه لا لازم جوتي رياضه (صج اني مخرفه رايحة اسوي رياضه بدون جوتي رياضه )



المهم كنت مستانسة اليوم لاني بدأت خطواتي نحو الرشاقه واللياقه




لكن لما شفت البنات والسيدات الموجودات انصدمت


انا كنت كتكووتة الكتاكيت جدام كل الموجودات هناك


قلت حق روحي مافي داعي اسوي رياضه ،، انا مو متينه


حتى كنت اشوف بطني واشوفهم ، انا ارشق وحده وانحف وحده


خفت يكفخوني الحريم ياية اقهرهم ، ضعيفه وتسوي رياضه بعد



عاد انا استانست ، قلت خلاص ما يباله وايد مجهود علشان استعيد قوامي


اللي ويانا كانو كانهم مال برنامج الخاسر الاكبر

لا حول ولا قوة الا بالله ، اللهم لا شماته ،،،، اللهم لا شماته ،،،،


الحمد لله على النعمه



نكمل :



اول شي لعبت على جهاز تقوية العضلات الكتف والصدر


وحدة من البنات شرحتلي كيف استعمله

عقب انا لعبت عليه ، استانست لما حسيت بالم في عضلات ذراعيني


وصرت احلم متى بيي اليوم اللي اتصير عندي عضلات وافتخر بعضلاتي المشدوده


بعدين لعبت على السيكل لتقوية عضلات الرجل العلويه (الشاورما اللي عندي )


طبعا كبدايه كل جهاز العب عليه 5 دقائق فقط وعلى قوى بسيطه جدا 5 كيلو فقط


كل جهاز عنده قوة معينه بالكيلو ، نزيدها مع زيادة اللياقه البدنيه.

اليوم كان اول يوم لي ، لعبت ساعة وحدة بس ،(تسخين)


كل شوية لعبت على جهاز ، والبنات ما كامو يقصرون يشرحون لي كل جهاز اشلون يشتغل

عقبال ما كلنا انروح النادي ويا بعض

انتظركم في الصيف يا بنات

قريبا ان شاء الله سيتحقق حلمي في ان اكون ما هره في السباحه

ما شاء الله حلوه يومياتج ام كتكووتووووووووو

وان شاء الله يتحقق حلمج

الله حلو أنا بعد أبي أنحف
ان شاء الله لما يعطيني الله فرص بسير مركز مثل ها المراكز
و أقول يا أم كتكوتو
انتي يومياتج أفنتك من أفنتوك

سلام عليكم حبايبي


شكرا لام خليل ، ان شاء الله جيونو ايي معاج يمسك خلوول ، وانا وانتي نرووح النادي


شكرا تاج تووج على الرد الحلو

شكرا معشووقه الحبووبة


الله يوفقكم كلكم حبايبي




نكمل يومياتي في النادي



اليوم كان ثاني يوم لي في النادي


طبعا لبست جوتي الرياضه قبل ما اروح النادي بنصف ساعة



كنت مريضه قبل ما اروح النادي ، بس قلت لازم اروح لاني دافعة فلوس


وعلشان لاني ابغي اصير رشيقه



المهم لما دخلت هناك وشفت المدربه الطيوبة والبنات الطيبات الله شافاني ، و استانست ونسيت اني مريضه ، الحمد لله



بديت العب على جهاز تقوية عضلات الكتف ، بعدين مشيت على جهاز المشي

ومستانسة لاني لابسة جوتي رياضه


تعبت وعرقت وايد ، وعضلات ريولي بدوا يعوروني ، استانست قلت خلاص الحين عضلات ريولي بتصير قويه



ولعبت على اجهزه وايد ،،،،،،،،،،،،،،،خسارة ما اعرف احط صور ، جان صورت لكم كل جهاز وحطيت صورته



طبعا الصالة مليانه انواع واشكال الاجهزه



ونلعب اللي نبغييه بس نبتعد عن الاوزان الثقيله اللي ممكن تسبب تمزق في العضلات للحريم




المهم احس بالشد في معضم اجزاء جسمي ،،،، لكن ،،،،، كرشتي ما زالت كما هي


كبيره كبيره كبيره ،،،،، ما احس باي شد فيها ،،،،،ولا حتى شويه



مشكله مشكله مشكله


انا مسجلة في النادي حق الكرشة بالذات


هو في تمرين في النادي حق الكرشة ، لكن بدون اجهزه ، لازم احط مرتبه على الارض واسويه



وهو مو صعب بسس انا اللي مستصعباه

لازم ارفع رجولي وانا نايمه على ظهري ، وانزلها بس ما اخليها تلمس الارض ،،، وارفع تاني


واسويه 8 مرات على الاقل في كل مره


انا ارفع رجولي وانزله مره ، ما اقدر ارفعها مره ثانيه ،،،، ان شاء الله بيي يوم اسوي هالتمرين بكل سهووله


دعواتكم حبايبي



بكمل لكم الباقي يوم الاحد باذن الله ، في الحصة الثالثة للنادي



اسمع تعليقاتكم على خير ان شاء الله

[size=كلما بغيتي صور بس خبريني وانا احط لك
والله شوقتيني اي النادي
يا ترى السباحة المدربة تعلمج ولا روحج....انا اغرق لو روحي



هذي الالة اكيد موجودة لانها الاكثر اهمية جهاز المشي ام نصور عندها واحد منه الله يبارك لها فيه لكنها اخر وحدة محتاجة لها الالات

تصدقووون في كل جوووجل ما حاصلت غير هذا ؟؟؟؟؟شو السالفة؟؟؟؟؟
ام كتكوتو احسن لج تصورين من النادي مالكم

شكرا حبيبتي ام خليل


كلك رقة وذوق

متحرمش منك ابدا


بالنسبة للسباحة في النادي :

في مدربة تدرب اللي يبغي يتعلم سباحه ، انا ان شاء الله سابدا تعلم السباحة الشهر القادم ، انتظركي اذا بغيتي ، جيبي معاكي جيونو وتعالي ، جيونو يمسك خليل


وفي اللي يسبح بروحة


وفي ايروبك في الماء


الاسعار معقووله جدا،



والمسبح



القول ايه عن المسبح




بركة تركوازيه كبيرة ، مثل بتووع الاولمبياد

ياما اشوفها وخاطري انط فيها ، بس لا اعرف السباحة ، كذلك البركة عميقه


ومزوده ب ادوات تعلم السباحة وكل شي


بتستانسين ان شاء الله \


عقبال ما نروح كلنا سوا

اليوم حبايبي عندي شد عضلي في ساقاي من الاعلى


وكلش يعوروني


يعاقبوني على كسلي كل السنين اللي فاتت

عقبال ما تصير عندي عضلات في كل اطرافي بعدين انافس الشيبه البريستيج



عنده عضلات حلوة ما شاء الله ، اغار منه ساعات



اليوم في تخفيضات في ماركس اند سبنسر

بروح ادور لي جوتي رياضه غاوي ، وبنطلون رياضه غاوي بعد



تبون شي اكتبو بسرعة قبل لا اروح السوق

الحمد لله انج لبستي الجوتي


فن وكووووووول يومياتج
ننطر الحصة الثالثه

اي صج
ابي واحد بيبسي وسنيكرز وبعد امممممممممممممم
لا تيبي سنيكرز يبي علبة جواهر بس اكبر واحد بس

انت تامر امر يا تاجنا (بس ادعي اصير رشيقة وسباحة ماهرة)


اجيب لك كرتوون بيبسي ، لا السفن اب افضل للصحة

واجيب لك ان شاء الله اكبر علبة من جواهر جلاكسي ،




رحت مارك اند سبنسر اللي في مجمع السيف ،و

اشتريت بدلة رياضة



وجوتي رياضه (مو مصدقة عمري اروح نادي)



وبنطلون اضافي (عندي جنون التسوق)



وكلينكس غاوي حق الاطفال .




كنت امشي بتعرج وبطيئ في مجمع السيف

لانه عندي شد عضلي في ساقاي من فوق لين تحت ،


بس الشوبنج ينسي الالم ، خاصة اذا في تنزيلات،

شافني ابو كتكوتو متضايقة من الشد اللي في ريولي

فعطاني شوية نصايح ، وقال لي :

لا تلعبين اجهزة تقوية عضلات الرجلين الحصة القادمة

العبي فقط اليدين والكتفين والبطن ، حتى ترتاح عضلات رجليكي

ثم واصلي .

حصتي القادمة يوم الاحد ان شاء الله

اداوم واخبركم



عقبال ما تخلصون كلكم امتحانات وتروحون شوبنج

أووووف إنت الرشيقة ف نادي وإحن قاعدين لاه موش كويس يلبخيلة دزينا شوي من أول يوم أنا بلبس جوتي بس أروح بجلابية البيت وأنط ع البالون وألعب بالحبل ..؟شوتقولين ياأم كتكوتو؟

تعالي يا بر الامان تعالي حياكي الله


تعالي بالجلابية عادي


انا اول كنت ضعيفة

الحين ويا الحمل والولادة صرت ضخمة وكبيره وعندي ترهل في كل مكان .


انت شكلج ما شفتيني من زمان


تعالي يلا نروح النادي سوا


عطيني خبر يا بربووره

تاخرتي علينا يا ام كتكوتو شخبار النادي شكلهم قايمين بالواجب معاج.... يلاماتتاخريش

شكرا ام خليل ، نورتي موضوعي بالصور الجميله

سوري حبايبي على التاخير



ييت اليوم من النادي شوية تعبانه


اكلت صحن كشري كبير ونمت نوم عميق



علشان كدة تاخرت عليكم




نيجي للمهم :




تعرفون من الحصة السابقه كان عندي شد عضلي ومنها اصابني الم ظهر بعد



نفس اللي صادني في الامارات ذاك المره وخلاني طريحة الفراش


بس هالمره على اخف



خذيت حبة كتافلام ، (الله يجزي خير خالي فداء لانه دلاني على هاي الحبة العجيبة المفعوول)



صرت اشوة ، لبست ثيابي الجديدة السبورتيه



وجت البنت اللي تقعد مع كتكوتو لما اروح النادي (بنت جارتي زينت )


وقعدت انتظر لين وصلت سائقتي اللي توصلني النادي




اليوم كنت خايفة العب ويصير عندي شد اكثر في ريولي او في مكان ثاني من جسمي




لكن الحمد لله ما صار شي ، بالعكس لعبت عضلات ريول والشد اللي كان امس بعد راح



شكلي خلاص تأقلمت على الرياضه _____(مصدقة عمرها الحرمة ،،،،تو الناس)





تراني لين الحين ما لعبت الاوزان ،،،،، بعدني كل الالعاب العبها على الوزنه خمسة



اوهووو يعني جدام في شد عضلي اكثر ،،،،،، يعور وايد

وفي رياضة الايروبك شفت البنات جايبين بالونه كبيرة وينطوون عليها

بجرب بكرة النط مع البالون بشوف حلو ولا مو حلو ، وكمان نط الحبل

ذكرني بايام الابتدائية .


وانا العب قلت باخذ بريك ،،،، رحت طليت على بنات السباحة



اليوم كانو 7 بنات مع المدربة في البركة التركوازية



ويسلام عليهم لما يسبحو ، تقوولي سمكة من مروونه السباحة


لا ما كانو اسماك ،،،، كانو حيتان ((( احجامهم كانت جدا كبيرة ))))


بس في الماي حركتهم خفيفة ورشيقة ، حتى انهم يسوون قلابية في الماي


انا اطالعهم واقول ما شاء الله ما شاء الله ، اوزانهم فوق المئة كيلو

بس خفيفات جدا في الماء

سبحان الله علشان جذي الحيتان في الماء مو في اليابسة




عقبال ما اسبح بمروونه ورشاقه ان شاء الله


وبعدين رحت كملت رياضه،،، والوقت بسرعة كبيرة يمر هناك لاني اكون في قمة استمتاعي


و بعدين ترجعني السائقة الى البيت ، واكون جوعانه بعد كل هذا اللعب



رحت طبخت قدر كبير كشري ، حق الاسبوع كله ،،، توفيرا للوقت والجهد،،،، قبل لا اخلص ،، الا لطيفة بوهير جايية

وجايبة لي صحن عيش ودجاج ((( ما شاء الله شوفو كيف الرزق يجي بدون لا نحتسب)))


تغدينا انا ولطيفة سوا ،،،، لما مشيت هي رحت نمت نووم عميق لين العصر



صليت وشغلت اللاب توب ، حصلت ام خليل كاتبة تعالي كملي اليوميات





بكرة عندي حصة بعد ان شاء الله لما ارجع اكتب لكم

مته تصبحين ماهرة في السباحة ورشيقة...
عشان احصل على طلباتي اكبر علبة جواهر وكرتون سفن اب

لا تستعجلي ان شاء الله يتحقق حلمج تكونين رشيقة وماهرة في السباحة...

ننطر الحصة القادمة

سلووووومي .....( يعني سلاااااااااام بس بدلع ).....

يومياتج جهنمية يا أم كتكوتو الصغنووونة ..........

ف خاااااااااااااطري من الخااااااطر آخذ اجازة أسبوع و أطير للبحرين و نتعلم سباحة سوا

عيل انا بأجل دروس السباحة لين ما انتي تيجين يا سمسوومة



ونسبح سوا

ان شاء الله يي اليوم اللي تكونين كدة



او تشاركين في مسابقة للسباحة نفس هاذييي



يارب يرزقج بها المسبح عشان تعلمينا سباحة في بيتج

جزيتي خيرا يا ام خليل على الدعوات الجميلة


ان شاء الله اكون نفس ما دعيتي لي


وان شاء الله يرزقني بيت في بركة مثل اللي في الصورة


وتعالوا اسبحوا كل يوم

اللــــــــــه .. أتخيل بيت أم كتكوتو فيه هالمسبح ..

مووووووول ما بفارقه بتم في بيتها كل ايام السنة لين تطردني


الله يرزقج أم كتكوتووو شرات هالمسبح و أحسن من هالمسبح بعد ..


يلا نتريا الحلقة القادمة

موول ما بطردج


اصلا انا اللي ما بطلع من المسبح


انتوا ادعو وربنا يتمم اللي فيه الخير والصلاح ان شاء الله




















اليوم انا كلش كسلانة من قمت الصبح


قمت وخاطري انام لين الظهر

طرشت العيال المدرسة


وديت كتكوتو بيت الجيران (يمسكونها لحد ما ارجع من النادي)





تجهزت للنادي بكسل




رحت النادي ولعبت كل الالعاب بتكاسل كبير



بس لعبة البطن شديت حيلي عليها لين ما عوروني عضلات بطني



طلعنا من وقت



رحت البيت ، واشوة في كمية من الكشري مال البارحة (علشان حدي كسلانه ، ما فيني شدة طباخ)




نمت في الصالة ، علشان لما عبدالله ايي من الروضه اسمع صوت الباب



وجذي يومي بكبرة فيني كسل شديد جدا




ومنها كنت حزينه لانه ابو صديقتي العزيزة جنت توفى نفس اليوم الصبح


الله يرحمه برحمته



يلا اخليكم مع الحصة القادمة بكرة ان شاء الله

إن لله و إن إليه راجعون ..
الله يرحمه و يصبر أهله على مصيبتهم ..


يوم قريت حلقة اليوم حسيت بكسل شديييييييييد .. شكلي بروح أرقد الحين .. ههههههههههه


تسلمين عالحلقة اللي ترقد ..


يلا نتريا اليديد


AKamPi

يوم الاربعاء 29 ابريل



حصتي الخامسة في نادي البسيتين للسيدات

اوف بعدني فيني كسل ،،، ليش ليش ليش ،،،قهر

رحنا وسجلنا دخول وحطينا اغراضنا وركبت على جهاز المشي ، قلت بمشي سريع

يمكن ايي لي النشاط



مشيت ومشيت ومشيت ومشيت لين تعبت عضلات ريولي وداخ راسي



نزلت منه ركبت جهاز الطيران ( تحركين ريولج وايدينج وانتي واقفه ،،، كأنج اتطيرين في الهوا)


ها شوية بدا النشاط ،،، يلا استانست


وسألت البنات ، هل تحسوون بالكسل ،،، قالو لي عادي تتعب العضلات وتحسين بكسل

بس بعد فتره كله اتكونين نشيطه ، زين طمنوني ،،، يعني الكسل شي عادي بعد



،،،،،

ياني حماس ورحت اقوي عضلات بطني على جهاز شد البطن

واسوي كل تمرين فوق العشرين مرة


اتعب ، ارتاح اخذ نفس ،،، والعب مرة ثانيه



اتخلص الساعة الاولى اكون في تعب وعطش شديدين




تعرفون مو خبرتكم اني اضعف وحدة في النادي (طبعا بالنسبة لكم انا امتن وحده)


سالتني وحده من البنات ، ليش انتي جاية النادي ، انتي جسمج زين ( شكلها مقهوورة اني اضعف منها)



قلت لها عندي وزن اضافي بالنسبة حق طولي ،،وكرشتي كبيرة ( طبعا كرشتي صفر جدام كروشهن ،،،،،، اللهم لا شماته ،،، اللهم لا شماته ،،، اللهم لا شماته ،،، ما قاعده اشمت ،، بس يالسة اوصف الوضع )



في جهاز اركب عليه واثبت ذراعيني فوق وارفع ريولي لين بطني
ما تتخيلون اشلون هالتمرين صعب حق وحدة دبة مثلي

ارفع ريولي مرة ،،، والم شديد في عضلات بطني


ثاني يوم رفعتهم مرتين ،،، وتعال يا ألم ،،، وانزلي يا ام كتكووتو ،،، اوهوو بكمل باجر هالتمرين



تمرين الظهر ،،،، ريولي مثبته فوق ، وانزل جسمي وارفعه مرة ثانية ،،،، في البداية طبعا الم
في عضلات الظهر ،،، وشد من الظهر لين عضلات الرجلين ،،، لكن بعدها يرتاح ظهري

واحس ما له داعي الكتافلام .



مو قلت لكم اني بعدني اشيل الوزنة خمسة كيلو فقط ، واذا كلش كلش عشرة كيلو ،،، تمرينين او ثلاثة واتعب ،،، واقوول يوم ثاني بسوي عشرة .


في بنية هناك ما شاء الله اتربي عضلات ،، اتشيل الستين كيلو وتتمرن عادي ،

وتلعب على الاجهزة الصعبة ،، وتشيل اثقال كبيرة (ما شاء الله عليها ، الله يحفظها )

شكلها مال الاولمبياد


عقبال ما اسوي ربع اللي اتسويه ،،، وتروح كرشتي



ويييييي ما قلت لكم ،،،، ابو كتكوتو قال لي اذا نزلتي خمسة كيلو اشتريلج خاتم ذهب



ما دري ليش احس انه متاكد اني ما بنزل خمسة كيلو ،،،،



بس بحاول وبحاول وبحاول ،،، السالفة فيها خاتم ذهب



لا لازم احاول ،،، اوه ذهب ،، ذهب ،،، ذهب

اكيد هو بيوديني اختار ،،،


بختار خاتم حجمه كبير وغالي ،،،، ( انزين انتي نقصي وزنج الاول وبعدين احلمي بحجم الخاتم )



صج اني متخرعة




يلا حبايبي شجعوني على الرياضة


وعطووني من نصايحكم الذهبية في تنقيص الوزن


يلا حبايبي ،،، ساعدوني علشان يصير عندي خاتم ذهب كبير وحلو



بسوي لكم حفلة جواهر جلاكسي ،،، لما يكون الخاتم الكبير في ايدي ان شاء الله

شكرا يالحبووبة ام خليل




تسلمين على النصائح والصورة الخاتم المغريه



عقبال ما يصير عندج نفسه واحلى واكبر منه بعد ان شاء الله